Buick Riviera 1966

Eisini Jákup Eli á Lava í Havn liggur skerflatur fyri amerikanarabilum, tí hann eigur ein
tann flottasta í Føroyum, ein Buick Riviera frá 1966

Hesin bilurin hjá Jákupi Eli hevur ein motor, sum er merktur 7,1, men so eru stempul, manifold og
toppstykki skift út, so hann er umleið 8,5, altso meira enn 8.500 kubikk – ein øgilig kraft – til at
eggja speedometurnálina, ið vísir miles. Jákup Eli hevur koyrt tað, ið svarar til 170 km/t við honum.
Bilurin er jú ein erkiamerikanari. Hann er enntá ikki av teimum tystastu eftir bensini, tí verður koyrt
hóvliga við honum, er hann slett ikki so slúkin.
Søgan um Buick'in hjá Jákupi Eli er tann, at hann seldi Mustang'in hjá sær, sum var frá 1966.
Hann seldi Rúna Djurhuus Mustang-bilin fyri tveimum árum síðan, og nú stendur hann inni hjá
Ford – hjá Wensil.

Ein rættur treffbilur

Jákup Eli skuldi fara til Danmarkar at keypa ein Mustang frá 1971. Tað var hann í hvussu er
sannførdur um, men so var hann saman við fleiri í felagnum fyri amerikanskar bilar í Føroyum, Am
Car Føroyar, á eini bilstevnu í Øster Urup nærindis Aalborg í Jútlandi. Har fall hann hjálparleysur
fyri hesum Buick'inum í somu løtu, hann sá bilin.
- Eg var seldur beinanvegin, sigur hann.
Jákup Eli fekk bilin heim við sær við Norrönu tveir dagar seinni eftir at hava tingast við eigaran
eina góða løtu hetta kvøldið á stevnuni. Teir hildu fram við tingingunum morgunin eftir, og aftaná
døgurða var avgerðin tikin teirra millum. Grundin til, at danskarin seldi bilin, var, at hann hevði ikki
loyvi at koyra við honum. Hann hevði stórar, óorginalar felgur, so varð hann tikin, varð hann
noyddur at betala fult avgjald.

Og maðurin græt

- Hann vildi illa selja bilin, so at tá ið hann læt hann frá sær, runnu tárini ... akkurát sum ein
smádrongur, altso, viðgongur Jákup Eli.
Her í Føroyum verður slíkt sum stórar, óorginalar felgur ikki kannað, so her ber til at koyra við
vetaranbilunum, ið verða innfluttir.
Jákup Eli fer út við sínum Buick við teirri treyt, at tað er turt í veðrinum, og tað er tað tíðum hóast
alt. Men regnar, fer hann ongan veg, flaggdagin undantikin, tí at tá er umráðandi at vera við sum
skilst. Tá ið veðrið er gott, fara teir einir 15-20 í tali út at koyra og hugna sær. Í roynd og veru koyra
teir alt árið onkran leygardag ella sunnudag, um veðrið loyvir tí.

Felagið Am Car (American Cars) Føroyar er á Facebook. Har sæst, hvat entusiastarnir fáast við.
Tað er rættiliga nógv og sera spennandi. Teir fara sjálvandi ongantíð allir í senn. Tað ber rætt og
slætt ikki til.
Her eru lutfalsliga nógvir amerikanskir veteranbilar í Føroyum. Johnny Nón í Runavík eigur
einsamallur einar sjey-átta sambært Jákup Eli á Lava.
Buick Riviera 1966-modellið sum tað hjá Jákupi Eli varð upprunaliga gjørt sum ein flótari, mikið
sportsligur til teir yngru garparnar. Hesin hevur fingið kønan umgang frá sínum eigara í Havn. Hann
hevur ein sera flottan lit frá at vera hvítur. Jákup Eli tók allan botnin úr honum, so at hann er líka
penur undir botninum – enntá í sama liti sum alt hitt. Hann er galvaniseraður og sproytaður allur
sum hann er, og tað hevur Jákup Eli sjálvur gjørt. Hann er jú tað, vit plaga at rópa kunsthandverkari.

Futuristiskt modell

Bilurin hevur fartpilot frá 1966, elektriskar rútar allan vegin runt, og sofan framman kann stillast
upp og niður og aftur og fram. Ein ordiligur luksusbilur tá.
Jákup Eli hevur ikki gjørt so nógv við henda bilin, sum hann gjørdi við Mustang'in, sum hann
seldi. Hann varð allur sundurtikin og tað uttan, at Jákup Eli fór á húsagang.
Tað ber bara til at halda seg flótandi fíggjarliga, um tú dugir nakað sjálvur. Tú kemur ongantíð
burtur úr tí aftur, um tú skalt betala fyri at lata onnur gera tað, ið gerast skal við eitt nú ein
amerikanskan flótara. Umráðandi er, at hann stendur inni garasjuni í sama temperaturi, 20 stigum
alt árið.
Jákup Eli á Lava hevur annars ein BMW frá 1972, sum hann ger í stand í løtuni. Hetta vísir, at
hann elskar sínar veteranbilar.
Um hann elskar teir meir enn okkurt annað, skal verða ósagt.