Tá ið Sofus Gilsstein á Oyri keypti sín amerikanska flótara, 1974 Ford Gran Torino Sport, var kona hansara í Danmark. Hann ringdi til hennara og segði: "Eg havi keypt mær ein gamlan amerikanskan bil."

Hetta segði Sofus við konu sína, Karinu Weihe, bara soleiðis, at hon varð ávarað, áðrenn hon kom heim. Tá ið hon kemur heim, er tað fyrsta, hon spyr: "Hvar er bilurin?" Hon sá ongan bil. Tað var bara ein ramma fyri níggju árum síðan – í 2009 – tá ið Sofus Gilsstein keypti bilin.

Sofus er klaksvíkingur, konan, Karina, er úr Havn, men tey búgva á Oyri. Sofus er útbúgvin elektrikari. Hann arbeiðir hjá KJ Hydraulik, ið hevur deildir í Havn og á Kambsdali. Sofus arbeiðir á deildini í Havn. Hann arbeiðir sum teknikari við el og hydraulikki og motorum.

Starksy and Hutch-røðin

Bilurin hjá Sofusi er eitt sindur arrutur. Sofus er ikki komin á mál enn við at shina bilin upp til eitt kromskyggjandi dollargrin. Tað tekur sína drúgvu tíð, og tað kostar nógv, men bíða bara. Sofus er fegin um at eiga henda flótaran, ið koyrir væl við sínum 351 (5,8 L) V8 Windsor-motori undir tí víðfevnda motorhjálminum. Har liggja eisini einir 190 hestar klárir. Hesin Ford Gran Torino hoyrir til 1970'ara-seriuna Starksy and Hutch. Hann er modell 1974, men kom á marknaðin í 1973 – fyri 45 árum síðan, so hann er væl og virðiliga eitt virðiligt ellisakfar í øllum sínum veldi.

Tað var meira og minni tilvildarligt, at Sofus fekk fatur á bilinum, tí at ein maður, sum eitur Ólavur Olguson hevði keypt bilin, men hann fekk ongantíð sett hann í stand og spurdi tí Sofus, um hann hevði hug at keypa hann.

- So, eg keypti hann bara; eg hevði pláss til tað.

Ólavur Olguson býr í Klaksvík, men arbeiðir nú hjá Berg Motors í Havn sum mekanikari. Hann dugdi at síggja, at hann hevði hvørki stundir, serligan hug ella pláss til at gera bilin koyrikláran, men Tummas Debes frá Gjógv hevði tikið hann við til Føroya úr Danmark, har hann búði tá.

- Tá ið Tummas flutti til Føroyar í 2003 hevði hann bilin við sær, sigur Sofus. Tummas kom við tveimum og einum hálvum bili, ein var sundurtikin, ein hálvur bilur var í eykalutum, og so var ein heilur bilur, til samans hálvurtriði bilur. Snilt, snilt!

Ford'urin hevði ligið og rikist ymsastaðni í landinum. Tummas hevði ongantíð pláss til at gera hann í stand. So keypti Ólavur bilin, men heldur ikki hann hevði umstøður til at fáa lív í bilin aftur, og tí keypti Sofus hann í 2009.

Stóð í níggju ár

Gran Torino'in stóð nú í níggju ár og patineraði meir og meir. Tá hevði hann staðið ymsastaðni í Føroyum, í Hósvík, í Havn og fleiri aðrastaðnis og átti í roynd og veru ongan góðan. Hann var illa farin, illa rustaður, og tann dýra og annars haldgóða amerikanska forkromingingin var illa brostin. Vit vita, at krom er ógvuliga dýrt, so tað fer at bíða nakað enn. Tað ger nú ikki so nógv, tí tann gamli bilurin livir nokkso væl, og tað gongur so lýðandi framá hjá honum.

- Kúfangararnir eru ógvuliga tungir, tann framman, haldi eg, vigar 48 kilo; eg eri ikki komin har til at pynta hann so nógv, sigur Sofus.

Hjá honum hevur tað rátt um at fáa tað til ein bil. Hann hevur verið ringur av rusti, men ramman, undirvognurin, bremsur og búsningar var alt nýtt. Sofus hevur einki skift av tí.

Hetta slagið av bili skal larma eitt sindur, og tað ger hann eisini. Her eru tveir smáir pottar undir umframt pípur í útstoytunum. Tey eru heil og holdig. Bilurin er sýnaður og góðkendur sum er.

Eingin flaggdagskoyring enn

Sofus Gilsstein hevur ongantíð enn koyrt flaggdagskoyring í Havn við sínum 1974 Ford Gran Torino Sport. Tað passaði so illa í fjør, og í ár hevði hann trupulleikar við startaranum. Kortini var hann nakrar túrar í fjør. Hann hevur verið í Fuglafirði við bilinum og fleir ferðir í Havn. Tað varð til tveir túrar tvey hóskvøld upp í slag seint í fjør summar. Tá vóru nógv ellisakfør við, serliga tann seinna túrin. Einir 20 bilar úr Eysturoynni, Havn og Vágum, heldur Sofus. Ja, og tvey ár upp í slag hevur Torino'in verið á mentanarviku í Sundalagnum í september. Leygardagin frá klokkan 3 til 6 í mentanarvikuni í ár verður eitt tiltak á Oyri, heimbygdini hjá tí gamla, hábærsliga bilinum.

Sofus Gilsstein, klaksvíkingurin á Oyri við konu úr Havn, er errin av sínum Ford Torino. Hann er góður við hann og hevur gjørt hann so væl sum til ber í stand. Hann hevur ikki lakkerað bilin sjálvur, men alt hitt hevur hann gjørt. Hann heldur fram at arbeiða upp á bilin, sum tað nú einaferð passar. Eitt arbeiði, sum bilurin trívist við, og tað er tað týdningarmesta fyri eitt ungdómligt ellisakfar við vindspegli úr Odense og lyktum úr USA. Alt fæst á netinum!

Bilurin er ein kempa, 5,45 metrar langur og beint yvir tveir metrar breiður. Til samanberingar er ein Ford Fiesta bara 1,70 metrar breiður og minni enn fýra metrar langur.

Hetta var tað stutta av tí langa um 1974 Ford Gran Torino Sport hjá Sofusi Gilsstein.

Tummil upp!